Sa kanyang ika-86 death anniversary noong May 26, 2018, inalala si Jose Corazon De Jesus, “Huseng Batute,” na kilala bilang “Hari ng Balagtasan” ng wikang Filipino.

Sa pangunguna ng Tanghalang Banyuhay Inc. na kinatawan ni Professor Jose Ladera Santos at Philippine Center of International Theater Institute/Earthsavers UNESCO na kinatawan ni Director Cecilia Guidote Alvarez, isang seremonya ang isinagawa sa Manila North Cemetery, kung saan nakalibing si De Jesus na namatay noong 1932.

Ang programa ay bahagi ng UNESCO International Arts Education week noong Mayo 20-23 kung saan inilunsad ang “UNESCO Peace Movement not by Force but by Art festival Forum” sa EAC theatre at sa Philippine Senate.

Nakibahagi sa activities sina Senator Joey Lina at Heherson Alvarez, Presidential Legal Counsel Salvador Panelo, Integrated Bar of the Philippines President Atty. Pete Principe, Cultural Center of the Philippines Chairman Arsenio ‘Nick’ Lizaso, at Philippine Information Agency Director General Harold Clavite.

Nagbahagi si Lizaso, pamangkin ni “Huseng Batute,” ukol sa buhay ni De Jesus ni bininyagan bilang José Cecilio de Jesús. Ang Cecilio sa pangalan ni De Jesus ay pinalitan ng Corazón, “puso” sa Espanyol, upang ilarawan ang kanyang karakter.

Sa halos 4,000 likhang tula ni De Jesus, ilan sa mga kilala ay ang “Bayan Ko,” “Anak ng Dalita,” “Pakiusap,” “Ang Dalagang Plipina,” “Ang Pamana,” at “Punong Kahoy.”